Дэлгэрэнгүй
Татаж авах Docx
Дэлгэрэнгүй уншаарай
Өө, Энх Тайвны Хаан одоо бүрэн эдгэрснийг хэлэхээ мартжээ. Түүн рүү сувдаг чөтгөрүүдийн бүлэг дайрсан юм. Би Түүнтэй хамт байж, аварсан. Тэр бол гайхамшигт төрөлтөн. Тэрээр энэ ертөнцийг аврахад надад туслахаар шавь болж эргэн ирсэн эртний Будда. Та нар Түүнд мөн маш их талархах ёстой. Одоо Тэр эдгэрсэн тул алс холын Хаад, бусад Хаадтай хийсэн яриагаа үргэлжлүүлж болох байх. Энэ хооронд би Досийн Нү Хааны дараах бусад Хаадтай хийж буй яриагаа дуусгахыг хичээнэ ээ. Үнэхээр чадна гэж найдаж байна. Орчлонгийн Анхдагч Хүч, БУРХАНЫ Хүчтэй холбогдвол та гэгээрэн гэтэлж чадна. Тиймээс чин сэтгэлээсээ авшиг хүртсэн хүмүүс авшиг хүртсэн өдрөө л чөлөөлөгддөг. Гэвч хуучин зуршил, орчны нөлөө, эсвэл Гэрэлд ороогүй найз нөхөд, гэр бүлийнхнээсээ болж авшигтан хүн амь хөнөөх, амийг нь хөнөөсөн төрөлтний мах идэх зэрэг өрөвдөх сэтгэлгүй хуучин амьдралдаа эргэн орж болзошгүй. Тэгвэл тэд энэ чөлөөлөлтийг хүртэж чадахгүй. Тийм учраас эрт цагт, эрт дээр үед Их Багш нар авшгийг хялбархан, хаа хамаагүй өгдөггүй байсан. Гэвч өнөө үед зарим Их Багш маш нарийн сонгодог ч ховорхон гэлтгүй авшиг өгсөөр байна. Баба Саван Сингх Жи Махараж амьд сэрүүн байхдаа авшиг хүссэн олон зуун өргөдлөөс зуу гаруйг нь сонгодог байсан гэж миний хаа нэгтээ уншсан тэмдэглэлд дурдсан байсан. Үүнийг нэлээд дээр уншиж байсан. Тэгэхээр жинхэнэ Их Багшаас авшиг хүртэх боломж тийм ч их биш. Өөрөөр хэлбэл боломж тийм ч өндөр биш. Тиймээс энэ дэлхийн асар олон хүнээс авшиг хүртэхийг хүсдэг хүн цөөн байдгийн улмаас би одоо ч маш шаргуу ажиллаж, зовж байна. Учир нь веган болох нь тэдэнд хэтэрхий хэцүү. Тэд Гэртээ харьж, чөлөөлөлтөө баталгаажуулан, тамаас асар хол, үүрд ангид байх боломжоо хамгаалахын оронд дадал зуршил, амтлах мэдрэхүйдээ бууж өгдөг. Үүнд зүрх минь ихэд шаналах юм. Би маш их хичээж байна. Өөр юу ч хийж чадах билээ дээ? Үнэндээ веган амьдралын хэв маягт амьтан-хүмүүсийн махнаас гадна архи, мансууруулах бодис, тамхи болон бусад зохисгүй үйлээс татгалзах ч багтдаг. Тиймээс ертөнцийн хүмүүс эдгээрийг дагаж мөрдөхөд маш хэцүү гэж боддог. Гэтэл бид уг нь ингэж л амьдардаг байсан. Бид ийм л төрсөн. Нийгмийн сөрөг нөлөөнөөс болж л бид улам сөрөг болсон. Энэ сөрөг энерги биднийг хаа сайгүй дагаж, гарч чадахааргүй бат бөх шоронд хорьсон. Тиймээс Их Багшийн Хүч, Ивээлгүйгээр гарах бараг боломжгүй. Гэвч хүмүүс ийм нөхцөл, амьдралын хэв маягт хэт гүн автсан тул БУРХАНЫГ санах, Буддаг санах, хамгаалалт, тусламж болон ангижруулан гэтэлгэх авшиг гуйж залбирах ч тэдэнд хэцүү болжээ. Нойрмог хэвээр буй хүмүүст оногдсон энэ бүх уналт, урхи, хоригдчихсон байдлыг үл харгалзан би тэднийг эрдэнэт нандин гэж итгэдэг, харин тэдний сүнс сөрөг хүчнийхний эрэн хайж ангуучилдаг тийм зүйл гэж үздэг. Хүмүүс үнэхээр өрөвдөлтэй. Тэдний зовлон, эмзэг байдлын тухай бодох юм бол зүрх тань өрөвдөх, энэрэх сэтгэлд автан, зүгээр л өдөржин шөнөжин ч уйлахаар. Надад ийм л зүйл тохиолдсон. Тиймээс би тэднийг хайрлахаа больж ердөө чадахгүй. Энэ ертөнцийн хамгийн муу нүгэлтэн байсан ч ялгаагүй би асар их хайрлаж, өөрт минь зөвшөөрөгдсөн хэмжээний буян хишгийг тэдэнд хүртээснээр тэд өөрсдийгөө өөд нь татаж чадахуйц болгохын төлөө, мөн элдэв чөлөө учрал бүрдэж, хамаг Их Багш нар хийгээд Төгс Хүчит БУРХАНЫ арвин их адислалын ачаар тэдэнд сэрж ухаарах, улмаар сүнсийг нь мөнхөд чөлөөлөх тэр л зүйрлэшгүй үнэт авшгийг хүртээх гэгээрсэн Их Багштайгаа учрах боломж гаргахын төлөө би хамаг чадлаараа хичээсээр байна. Нэгэн өдөр энэ бүхэн биелж, энэ нь манай гаргийн цорын ганц амьдралын хэв маяг болоосой гэж би залбирдаг. Хүмүүс энэрэнгүй л байхад өөр бусад юу хүссэнээ хийх асар их эрх чөлөөтэй. Өөртөө яаж хандуулахыг хүснэ бусадтай тэгж л харьц. Өөрийн биеийг БУРХАНЫ нандин сүм хэмээн үзэж, зөв арчил. Амьтан-хүмүүсийн мах, мансууруулах бодис, архи, тамхи болон бие, сэтгэл болоод оюун ухааныг гэмтээж, сүнсэнд үнэхээр хор хөнөөл болох аливаа зохисгүй зүйлсийг бүү хэрэглэ. БУРХАНЫ хүүхдүүд болох хүн төрөлхтний амьдралын хэв маяг, сэтгэлгээ, эрхэм угсааг залж чиглүүлдэг тэр зүйл бол сүнс юм. Гэвч БУРХАНЫ хүүхдүүд эргэн тойрондоо нэвтэршгүй хана мэт асар олон сөрөг саад барцдыг бий болговол сүнс бас тийм ч их юм хийж чадахгүй. БУРХАН ямар агуу хүчирхэг болохыг ойлгож байгаа биз. Гэвч хүн төрөлхтөн өөрсдийн босгосон хананд хоригдсоноор БУРХАНЫ Ивээл, Адислал, Хайр, Хүчийг ч хүлээн авч чаддаггүй. Хүмүүс сонгох эрх чөлөөтэй ч олон хүн үүнийг хор хөнөөлтэй зорилгоор ашигладаг. Ингэснээр сүнс нь маш доод төлөв, доогуур түвшний байр сууринд хүрч доройтон, БУРХАНЫ хүүхдэд зохихгүй муухай, бохир, хорт бодисоор дүүрсэн цөөрөмд сэлэх мэт асар их зовлон эдэлдэг. Энэ тухай бид өмнө нь ярьж байсан. Би үргэлжлүүлэн ярих хэрэгтэй эсэхээ мэдэхгүй байна. Ай, БУРХАН бид бүгдийг адисалж, та нар хурдан сэрэх болтугай. Та нарт хэлж, та нарын төлөө залбирах зүйл энэ л байна даа. БУРХАН минь, Өршөөл, Хайранд Тань, мөн бид уй гашуу, зовлон, нүглийн хамгийн гүн худагт байсан ч биднийг хүлээн авч, уучилсаар байгаад Тань баярлалаа. Та биднийг хүлээн зөвшөөрсөөр, Та биднийг Гэртээ хүлээсээр. Эзэн минь, бид Танд гүнээ талархаж байна. Агуу МАПА, бид Танд гүнээ талархаж байна. Гэхдээ бодоод үз. Та нар БУРХАНД итгэж, БУРХАНД найдаж, ТҮҮНИЙ Өршөөл, Уучлалд итгэх ёстой. Эцэг эх маань биднийг үргэлж хэчнээн их уучилж, ялангуяа зовлонд орсон үед маань хэрхэн халамжилдгийг төсөөл. Гэхдээ бид бас эцэг эхийнхээ зөвлөгөөг сонсох ёстой. Тэд бол ахмад хүмүүс. Тэд илүү туршлагатай, мөн үр хүүхдээ асар их хайрладаг. Тиймээс зөв сайн шашнуудын сургаалд эцэг эхээ хүндэлж, хайрлахыг захидаг. Учир нь тэд БУРХАН Чанарын тусгал юм. Тиймээс та нар эцэг эхдээ үнэн зүрхнээсээ ачлалтай бол тэднийгээ хүндэлж хайрлан, хэрэгтэй үед нь төдийгүй хэрэггүй үед нь ч эргэж тойрон, хүндлэл үзүүлж, бага гэлтгүй халамжлан, хайрлуулж, үнэлэгдэж байгааг нь мэдрүүлбэл тэд өтөл насандаа аз жаргалтай байна. Хэдэн настай ч байсан хүүхэд бүр ингэх ёстой. Учир нь ингэвэл та асар их буян бас хураана. БУРХАНЫ Ивээлээр та дахин хүн болж төрөн, бүхий л онцгой эрх дарх, оюун ухаан, адислалыг хүртэнэ. Тиймээс бид эцэг эхдээ үнэхээр ачлалтай байх нь зүйн хэрэг. Миний харснаар эцэг эхийн 99.9 хувь нь үр хүүхдээ ямар ч нөхцөл болзолгүй хайрлаж, халамжлан, хамгаалдаг. Үүнээс төсөөлшгүй их, агуу, асар өргөн цар хүрээнд БУРХАН, жинхэнэ БУРХАН ийм байдаг. Энэ л Эцэг Эх, МАПА та бүхэнд хамгийн сайныг л хүсэж, чадах бүхнээ хийдэг. Бидний Эцэг Эх, Төгс Хүчит БУРХАН, бидний МАПА бидэнд хамгийн сайн бүхнийг, хамгийн жаргалтай, хамгийн амар амгалан амьдралыг өгөхийн тулд үргэлж чадах бүхнээ хийдэг. Тэгээд МАПА Диваажин дахь БУРХАНЛАГ байдал үгүй энэ ертөнцөд ирэх сонголтыг хүртэл та нарт өгсөн. Та нар ирэхийг сонгосон. Та нар ялгааг нь мэдрэхийг хүссэн. Тиймээс Диваажингийн амьдралаас өөр шинэ зүйл сурч, буянаа хураан, амьдралаа бүтээж, адислалаа хүртсэн мэт мэдрүүлэхийн тулд доош бууж ирэхийг тань хүртэл БУРХАН та нарт зөвшөөрсөн. Энд ирж, эцэс төгсгөлгүй зовох хүртлээ та нар ингэж бодсон. Учир нь энэ бол өөр ертөнц. Өөр хэлбэлзлийн нөлөөтэй, өөр эрчимтэй. Диваажин шиг тайван, жаргалтай, амарлингуй биш. Хамгийн доогуур Диваажин ч энэхүү хуурмаг биет ертөнцөөс өчнөөн сая дахин илүү дээр. Энэ бол биет, хүртэж, харж, мэдэрч болдог ертөнц ч гэлээ энэ бүхэн тэр чигтээ хий хуурмаг. Таныг урхидан, бүгд бодит гэж итгүүлэх гэсэн муу энергиэс бүтсэн төдий зүйл юм. Ургаа мод, түүний үндэс болон модыг бүрдүүлдэг бүх зүйлийг бодоод үз. Бид модыг газарт үндэслэж, шорооноос, шороогоор бий болсон гэж боддог. Гэвч мод агаар, агаар дахь энерги, агаар дахь зарим бүрэлдэхүүн хэсгээс бий болдгийг эрдэмтэд хүртэл мэддэг болсон. Бид энэ тухай нэвтрүүлэг хийсэн. Эргэж олж үзээрэй, уншаарай. Хүмүүс ч бас тийм гээд бод доо. Олон бүрэлдэхүүн хэсэг нэгдэж байж хүнийг бий болгодог. Эхлээд анхны хүмүүс, дараа нь эхийн хэвлийд бүрэлдсэн. Photo Caption: “Тод, Хайр Татам Өнгөнүүд нь Бүгдэд Диваажинг Сануулах Зорилготой”
